PUISI BAHASA BALI

PUISI BAHASA BALI

Mati Nguda

Madiane magantung senjata lanang
Sirahe matekes bendera gelah
Barak-barak karsane maules kenyung
Putih-putih karsane tulus mulus

Tegal pangkunge keterabak tan sawetara, Matatah mirang parangan, Ngrobok duin urip, Mirib mapinunas jelap tekad apang maan buka keto, Sambilanga sing nawang nyen nunden muah ngajinin

Inget sukune pancer gumi
Sukane aketi mabakti ken pertiwi
Takut suarane sing katimpalin
Masuriak nyerit Belanda musuh kai
Suara barak suryan barak laksana barak

Anggene tidong gelah, Kentelan serbuk tanah, Idupe tungkulan suling tawah, Atmane sing dadi puun, Ngawewehin suarane tandi cadik, Musuhe katon kelepon, Lantas nurumbag pagelaran yuda, Masuriak nyerit Belanda musuh kai, Kanti nepukin unduk buka jani

Madiane magantung sanjata lanang
Sirahne matekes bendera gelah
Marengin kenyitan apine kuning bering
Nyohsoh maserah angga marep pertiwi
Magrebiug
Tangkahe bolong

Barak-barak lambene maules kenyung, Putih-putih karsane tulus mulus, Ambune sumirit ngebekin jagat

Olih : Putu Sedana

BUNGA DI ATI

Yen tolih melahang

Nak mula cara pragina

Lengen lantang bastis dawa

Bangkiang rengkiang cara biola

Ngae kenehe uyang paling

Yen tolih melahang

Nak mula cara penyanyi

Munyi halus nelusuk hati

Paras ayu buka selebriti

Sing taen absen kaipiang

Bajang jegeg gadis kampung

Diapain kampung nak mula ayu

Ayu saking tengahin ati

Sampurna sekadi bunga

Miik ngalub ngebekin gumi

Bajang jegeg gadis bali

Sing ada ne nyidang nyaingin

Sing ade ne nyidang matuhin

Ayu paras ayu budi

Nyihnayang gadis bali sujati

Ilang suba ragu di ati

Nyingakin paras ayu sekadi dewi

Saking langit turun ke mayapada

Miik ngalub bunga swarga loka

Ilang suba rasa sangsaya

Gadis ayu gadis bali sujati

Ayu paras ayu budi

Ngae tentram ring ati

Kanti mati

Bali

Tabuh, solah lan wirama driki masikian

Idup kaidupang antuk dasar manah suci

Suara bajra ida pedanda mlarapan weda-weda

Juru kidung matimpuh ngidungang wargasari

Sekadi maayunan ring muncuk-muncuk penjore

Magejeran ring oncer canang sari

Luhur masucian tur dahating ngulangunin

Sajeroning manah

(buin pidan tiang liang, apang liang dini di tengah-tengah oleg tamulilingan)

Ngiring mangkin sikiang ragane

Nyegjegang warisan leluhur sami

Mabalik sumpah ring manah soang-soang

Anggen sanjata dahating sakti

Pacang warisin oka putune ungkuran

(buin pidan tiang sebet, apang sebet dini katembangin pupuh semarandana)

Wentenke?

Becikan ring hidup pasuka-dukan

Salunglung sebayantaka

Ngulangunin suara suling pangangon

Bajang-bajang nembang ngalih saang

Semar paguling di jaba pura

Wentenke?

(buin pidan tiang mati, apang mayi dini, kaaterang kakawin prihantemen)

Olih : Ngurah Yupa

Tutur Tuturang

Jani makejang suba dueg nutur

Kemu mai ngaba tutur

Ulian tutur anak bisa dueg

Ulian tutur anak bisa sugih

Ulian tutur mase bisa lacur

Ulian tutur demenin timpal

Ulian tutur muane benges

Sing bisa nutur

Orahanga jeleme belog

Kedekin timpal

Dueg nutur

Kema mai ngaba tutur

Marasa bonggan

Kema mai nutur

Tutur buin tuturang

Ane medik dadi liu

Pelih bisa dadi beneh

Beneh masi bisa pelih

Engkur engkur ……..

Nglidang awak belog

Gelar gelur ngedengang goba

Kauk kauk pang kadena dueg

Ane besik dadi dua

Ane bawak dadi lantang

Beh…..

Liunan tutur med ningehang

Olih : Dian Saputra

Bikul

Ri kala anake agung,

Masabda,

Mangda nreptiang pawangunan,

Ring Kuta negari,

Desa desa,

Rauhing ka gunung-gunung

Sami trepti,

Nglaksanaang pawangunan,

       Ri kala puniki

       Ipun I bikul

       Makenyem liang

       Padelok mangintip tongos,

       Ngalih amah ane melah,

Inggih ratu,

Ngiring mangkin,

Ulah,

Ejuk,

Pademang,

       Ipun I bikul

       Meseh jagat

       Sane momo,

       Angkara,

       Durhaka,

       Sane ngranaang,

       Janggel pawangunane,

Ngiring ratu,

Pada yatna ngaba raga,

Reh I bikul,

Ngamargiang daya upaya singid,

Ngutgut ngupinin,

Saking silib,

Nglaksanaang manah corah

Olih : I Gusti Made Suastika

Pagaen Titiange

Ri kala puniki titiang ngeling

Ring panggunge

Para penonton sareng sungsut kayun

Ring korsine

Blabar yeh mata ngliahin

Gedung komedi

       Tedung sampun kaunebang

       Tenges matekep

Sajeroning langse di tengah rangkine

Mawali titiang makenyem

Sedih titiang kimon ngae-ngae

Nanging….kalin titian para penonton

Ngebiosang yeh mata

Ngeling, sengu-sengu

       Ah, pegaen titiange

       Kimon mancing kasedihan timpal titiange

      

                                                Olih : Wayan Rugeg Nataran